Муус устар 7 күнүгэр С.С. Васильев – Борогонскай аатынан улуустааҕы киин библиотекаҕа Уус Алдантан төрүттээх Дьокуускай куоракка олорор “Ийэ тыл” түмсүү кыттыылаахтара оскуола оҕолорун уонна ийэ тылы тарҕатыыга үлэлэһэр биир дойдулаахтарын кытта көрсүһүүнү тэрийдилэр.

          Көрсүһүүгэ “Саха бэчээт” ГАУ генеральнай директорын солбуйааччы О.И.Семенова, Ил Түмэн хаһыат бас редактора, 2008-2023 с.с. СӨ суруналыыстарын сойууһун бэрэссэдээтэлэ Г.А.Бочкарева, СӨ норуодунай артыыһа В.И.Заболоцкай, “Чолбон” сурунаал сүрүннүүр редактора Д.Н.Макеев, поэт, психолог, суруналыыс Я.Е. Байгожаева, норуот үөрэҕин тарҕатааччы, “Олох үөрэҕэ” норуот педагогикатын киинин салайааччыта Т.И. Жиркова, СӨ Национальнай библиотекатын сүрүннүүр библиограба Т.Н.Готовцева кыттыыны ыллылар.

          Кэлбит ыалдьыттарга оҕо библиотекатын иһинэн тэриллибит улуустааҕы “Сандаар” оҕо сахалыы ааҕыытын көҕүлүүр киин салайааччыта В.А. Портнягина киэҥ ис хоһоонноох иһитиннэриини оҥордо. Салгыы ыалдьыттар ийэ тылы харыстааһыҥҥа былааннаах үлэни –хамнаһы тэрийэргэ, кэнчээри ыччакка туһулаан сахалыы санааны өйгө-санааҕа иҥэрэллэригэр үтүө сүбэлэри биэрдилэр. Инникитин кэмиттэн-кэмигэр маннык көрсүһүүлэр, араас хабааннаах  тэрээһиннэр бииргэ түмсэн ыытылла туралларыгар баҕа санааларын эттилэр.

          Кэпсэтиигэ кыттыбыт оҕолор инникитин ийэ тылларын харыстыырга, омук быһыытынан сүтэн-симэлийэн хаалбакка, төрөөбүт тылларын инники тутан сайдыы суолун тутуһарга кэскиллээх санаалаах тарҕастылар.