Муус устар 3 күнүгэр Тандаҕа Уус Алдан улууһун түөрт Дьоруойдаах Байаҕантай нэһилиэгин киэн туттуута буолбут Тандатааҕы историко-архитектурнай музейы төрүттээччи, РСФСР уонна Саха АССР оскуолаларын үтүөлээх учуутала, Саха АССР култууратын үтүөлээх үлэһитэ, Үлэ кыһыл знамята орден кавалера Иван Павлович Готовцев олоҕун, айымньылаах үлэтин толору сырдатар "Үлэҕэ анаммыт олох" дьоһун кинигэ сүрэхтэниитэ буолла. Бу олус истиҥ, сэргэх тэрээһиҥҥэ улуустааҕы киин библиотекаттан А.Н.Готовцева кинигэни ырытыыны киэҥник сырдатан, дьон интириэһин тарта. Р. К. Колодезникова улуус электроннай библиотекатыгар киирбит Иван Павлович олоҕун, үлэтин сырдатар кинигэлэри, виртуальнай быыстапканы билиһиннэрдэ. Иван Павлович аймахтара бу дьоһун кинигэни ааҕааччыларга анаан улуустааҕы киин библиотекаҕа бэлэх ууннулар.
