Тохсунньу 16 күнүгэр Киин библиотека иһинэн үлэлиир «Уһуктуу» айар куттаах дьахталлар түмсүүлэрэ 2017 сылы түмүктүүр тэрээһинэ буолла. Тэрээһиҥҥэ Мүрү 1-кы нүөмэрдээх орто оскуола учууталлара ыалдьыттаатылар.

  Ааспыт сылга «Уһуктуу» айар куттаах дьахталлар түмсүүлэрэ үгэскэ кубулуйбут Национальнай библиотека, Саха сирин суруйааччыларын ассоциацията тэрийэр Литературнай пикникка, Аан дойдутааҕы поэзия «Үрүҥ хаар алгыһа» фестивалыгар, поэт Н. Рыкунов төрүттээбит «Отуу уота» литературнай түмсүү 50 сылыгар аналлаах литературнай киэһэҕэ кытынныбыт. Сыл устата түмсүү чилиэннэрэ Татьяна Находкина «Былдьаммыт дьылҕа» сэһэннэр, кэпсээннэр хомуурунньуктарын, аҕата, Аҕа дойду сэриитин кыттыылааҕа, Ленин орденын кавалера, сылгыһыт Петр Находкин туһунан «Үлэ – дьылҕа бэлэҕэ», Галина Иванова - Айтыына «Элэмэс аттаах Эрэли бухатыыр» олоҥхотун, оскуола орто сүһүөх кылааһын үөрэнээччилэригэр аналлаах «Өбүгэ үгэһин утумнаан» кинигэлэрэ, Анна Данилова – Сарыада «Тапталы туойаары», Акулина Иванова – Айгыына «Арыт түүлбэр... Арыт сүрэхпэр»   хоһоон хомуурунньуктара ааҕааччы киэҥ эйгэтигэр таҕыстылар. Ону тэҥэТатьяна Винокурова – Кустук Таана, Варвара Парникова – Үүйэ, Антонина Бурцева – Далаһа, Александра Местникова айымньылара Саха сирин араас муннуктарыттан ситим нөҥүө бөлөхтөр хоһооҥҥо холонооччулар хомуурунньуктарыгар таҕыстылар.

Сыл түмүгүнэн «Удьуор утумун салҕааччы» анал аат «Элэмэс аттаах Эрэли бухатыыр» олоҥхону айбыт Галина Иванова – Айтыынаҕа, «Көхтөөх уус – уран айааччы» анал аат литературнай күрэхтэргэ ситиһиилээхтик кыттыбыт Антонина Бурцева – Далаһаҕа туттарылыннылар.